Un encarapuchado asasinou de tres disparos a Mario Dacosta, parlamentario do BNG, cando saía da reunión do Consello Nacional. Nesa reunión, a executiva, co seu voceiro Óscar Quiroga á cabeza, presentou a súa dimisión. Os feitos aconteceron pouco despois das seis da tarde, cando Dacosta se dispuña a arrincar o seu coche, estacionado no aparcadoiro do Hotel Congreso de Santiago de Compostela. Segundo fontes da Delegación do Goberno, o pistoleiro achegouse ao parlamentario e asestóulle tres tiros, fuxindo posteriormente nun vehículo Renault Clío. Un dos disparos impactoulle na cabeza, provocándolle a morte. Fernando Xelmírez, secretario da UPG, partido integrado no BNG e no que o parlamentario militaba dende 1982, amosouse conmocionado polo suceso e cualificou a Dacosta de "Camarada insustituíble e extraordinario patriota galego". Horas antes do crime, Óscar Quiroga anunciara a súa dimisión no Consello Nacional cónclave no que tamén presentou a renuncia toda a executiva. Abríase así unha nova etapa despois da derrota sufrida nos comicios autonómicos do 1 de marzo, cuxos resultados devolveron a maioría absoluta ao Partido Popular en detrimento do goberno bipartito formado por PSdeG-PSOE e BNG. Alberte Cudeiro, un detective con ínfulas taoístas, recibirá da dirección do BNG o encargo de investigar este crime, que o levará, tamén, a resolver un enigma relacionado coa guerra civil...